Schon umhi Briensermärt

«Ds Resslischpil» (um 1900) ist noch heute das Kennzeichen des Brienzermärt und für Gross und Klein eine unverzichtbare Attraktion.  

Am diesjährigen «Briensermärt» erscheint bereits die dritte Broschüre der Burgergemeinde. Gefüllt mit grossartigen historischen Fotos, Erinnerungen und Geschichten. Seit Anfang Jahr arbeitet das Team Brienzer Dorfgeschichte im Hintergrund, bis das ansehnliche Magazin druckfrisch auf den Markttisch kommt. Was es da so alles zu tun gibt, berichtet das jüngste Teammitglied Heidi Blatter-Michel (Welses), aufgewachsen im Änderdorf, im «Chrisviertel».  

I bi siit Afang Jahr niww im Team vor Brienser Dorfgschicht. We mmi ds lescht Jahr epper hätti gfräägt, ob i mier das chennti vorschtellen, hätt i grediuusi gglached. I, waan e totaali Chaschte (Computer) -Banausen bin, vo tuuten und blaasen ghein Ahnig ha ghäben, wie mma die Wundermaschini in Gang reised.

Aber die Dorfgschicht hed mi packt! Und esoo hocken i mid ere Team-Koleegin im Piiro und tue Fotooni beschriiben, mit Ort und Datum und gar mengischt chund d Fraag uuf: Wa chennt das siin, old wär bchennd die Person? We mmiers sälber nid wissen, de frääge mmer ir Träpplig-Gruppen (ältere Menschen, die sich regelmässig mit dem Team Brienzer Dorfgeschichte für einen Austausch treffen).

Underdessen han i mi agfrinded mit däm Flimmerchaschten und bi sogar schon esoo wiit, das i, wes es den bruucht, die scheennen aalten Bilder cha zwägschniiden und Kontrascht, Hälligkeit, Klarheit und mi Liebling «Dunst entfernen» ischtellen. Wään das mengischt im Alltag o gäbig, wemma chennti e chlii Kontrascht und Farbteiffi veränderen und alls e chliin häller machen. Me gsääch vlicht mengs e chlii klaarer. Was, daa wääs an dänen näbligen Orten o froh, wes chennte mmid eim Klick den «Dunst entfernen».

Iisi Arbeit beschteid nid nummen us Fotooni bearbeiten vo vergangene Ziiten; nei, es siin ganz vil Begägnigi, ds doorffe mmid de Lliiten. Esoo cheme mier geng umhi zu spannende Gschichten. Die Bbrichta chemen den uf iisi Internetsiiten old o i d Broschiiren.

I wiinschen allnen ganz e farbigi Ziit und wurdi mi freuwwen uf en Huuffen niww Fotooni von ewwch, und wen er sa den in aller Klaarheit uf iiserren Internetsiiten www.brienzer-dorfgeschichte.ch gääd ga gscheuwwwen, de gsehder den, was da alls derhinder steckt und wievil Freid mier das macht. Bis pletzli am Briensermärt, eso vil verraaten i no: Di dritt Broschiiren ischt bleger scheen chon.

Matrosenreigen an der Turnvorstellung 1942 Foto: Archiv Brienzer Dorfgeschichte

Dialektgeschichten und fast in Vergessenheit geratene Brienzerdeutsche Wörter finden Sie auch in der dritten Broschüre. Haben Sie gewusst, dass der Turnverein Brienz die zweitälteste Sektion des Berner Oberlandes und heute mit ca. 450 Mitgliedern einer der grössten Vereine in unserem Dorf ist? Freuen Sie sich auf diesen Bericht und viele weitere Perlen mit auserlesenen historischen Fotos.

Die dritte Broschüre der Burgergemeinde Brienz wird am Donnerstag, 9. November am Brienzermärt, am Stand vor dem Burgerhaus, für einen Unkostenbeitrag von 5 Franken verkauft.